Dúbidas sobre as actas de avaliación

Sempre que utilizamos un modelo por primeira vez temos dúbidas sobre como enchelo. Agardamos que con estas aclaracións poidades entregar as actas de avaliación NI-QUE-LA-DAS. Podedes consultar as veces que precisedes. Non esquezades nunca o enderezo do blog. Os documentos siguen aquí.

Como vedes, na columna da esquerda da primeira páxina pide que escribades o número de alumnos que están por enriba do límite de faltas de asistencia. En primaria, a porcentaxe de faltas de asistencia sobre o número total de sesións é do 15%. Se tedes algún alumno nese caso, debedes contabilizalo na cuadrícula "Nº". Canto supón ese número de alumnos (non conformes en asistencia), con respecto ao total? Debedes consignalo na cuadrícula "%". Agora poderemos saber se o noso curso é conforme ou non con respecto ás faltas. Onde está iso recollido? No documento escondido aquí. Por exemplo, se eu son a titora de 3º, e o 30% do meu alumnado supera o límite de faltas, o meu grupo será non conforme. Deberemos analizar a situación, e tomar medidas. Afortunadamente, é moi raro que isto suceda.

Imos agora coa columna da dereita. Aquí consignamos o número de alumnos que suspenden máis de dúas áreas. Calculamos a porcentaxe sobre o número total de alumnos do noso grupo, e o anotamos na cuadrícula "%". Se esa porcentaxe supera o límite que temos fixado no documento que vimos anteriormente, a Xefa de Estudos consignará a non conformidade do grupo. Neste caso, na seguinte reunión de ciclo, debedes acordar medidas a tomar co grupo, xa que un elevado número de suspensos nunha aula debe dar lugar a accións claras e concretas a tomar entre todo o profesorado.

Fixémonos agora no recadro superior. Aquí debemos consignar as áreas que non completaron a programación que tiñan prevista. Un grupo será non conforme se máis de dúas áreas non cumpriron o previsto. Será preciso averiguar as causas e acordar algún tipo de medida para mellorar a situación.

Lembrade que, en todo caso, será necesario que a Xefa de Estudos saiba se o voso grupo é conforme ou non con respecto á programación impartida, á porcentaxe de alumnos que superan o límite de faltas, e á porcentaxe que superan o límite de suspensos. Desta forma, poderemos facer un balance educativo útil que nos sirva para superar as dificultades deste trimestre, propoñer melloras, ou buscar a solución a determinados problemas.