Auditorías

Xa temos calendario para as auditorías anuais. Lembrade que auditoría rima con alegría ou lotería e ten que ser unha palabra que nos transmita outras sensacións distintas ás que lle atribuímos habitualmente.

Primeira avaliación.

Xa está aí a 1ª avaliación que, como naquel anuncio do turrón, chega polo Nadal. Os documentos precisos para xestionala serán enviados por correo a cada responsable, pero nestes enlaces podedes descargalos.

• Procedemento
• Instruccións para preencher as cualificacións de cada titoría
• Modelo Xade Acta da avaliación 
• Claves de apoio para cumplimentar as actas da xunta de avaliación

Non dubidedes en pedir axuda e información, se tedes calquera dúbida.

Plan de formación 2012-2013

Xa estaba elaborado hai uns días pero non houbo tempo de subilo. Aí está o noso plan formativo deste curso. Como veredes, algunhas accións están rematadas. E non é pouco o que nos queda por diante.

Habemus Plan Estratéxico e Plan Anual

Xa temos elaborados os Plans Estratéxicos 2012-2016 e Anual 2012-2013. Premendo nos pés de  imaxe podedes acceder a eles.

Plan estratéxico 2012-2016

Obxectivos do Plan Anual 2012-2013

A Abalar

Onte, xoves 15 de novembro, comezamos a Abalar na aula idem. Se ben non temos aínda os ultraportátiles dos alumnos, cos que comezaremos realmente a meternos en fariña, estivemos reflexionando sobre a web 2.0, coñecendo o espazo abalar, familiarizándonos co ordenador de aula e mirando algunha aplicación. Mesmo xa temos deberes para traer feitos na próxima sesión!

Resultados da avaliación das reunións

Xa non o lembraredes, pero a primeira semana de setembro tivemos un intenso calendario de reunións para informarnos acerca do funcionamento da escola. Pasamos un cuestionario de avaliación via Google Drive, e aínda que non todos respondistes, pensamos que xa podemos dar por pechado o período de respostas.

Agradecemos as vosas suxestións, que serán tidas en conta, dentro das nosas posibilidades, en vindeiras reunións. Debedes saber que estas reunións figuran como sesións de formación interna dentro do noso "Plan de Formación", que será publicado en poucos días. Se queredes saber o resultado da enquisa sobre a sesión de "Biblioteca e Sistema de Mellora" premede aquí. E se queredes coñecer o resultado da sesión sobre "Programación e caderno do profesorado" premede aquí.

Calendario de avaliacións

Estamos xa metidos en fariña: mirade atrás e volvede ao luns, cando chegastes ao centro. A que non pensabades que ía estar xa todo isto feito? Xa sabemos cando imos avaliar, e vemos tan cerquiña as sesións de xuño de 2013... Pinchando aquí teredes acceso ao calendario, que quedará "colgado" de forma permanente á dereita. Grazas pola vosa entrega, e por levar tan ben unha semana ateigada de reunións e novidades.

A primeira

Esta é a primeira entrada do curso que vimos de estrear.Sirva para dar a benvida a todos e todas vós. Coma sempre, primeiro hai que decidir por onde imos camiñar, así que publicamos o calendario escolar para que non teñamos dúbidas dos días de traballo e de descanso que nos quedan ata o 30 de xuño.

Por se non o ves ben, ou queres aclarar dúbidas, podes pinchar aquí, e mesmo baixar o documento.

Adiamos a Xunta de Avaliación

Despois de ver as caras desta mañá e de darnos conta mirándonos que non somos os únicos agobiados, a solución S.C. (sentido común) é: precisamos unha semana máis. Pois ben, postos todos dacordo, por que non? Mantemos o horario, pero trasladando as Xuntas de Avaliación do luns 11 e martes 12 para o 18 e 19. Só hai que contar con que os titores van ter que imprimir os boletíns a toda présa!

Lembrade que o importante é a saúde, e xa temos bastantes atrancos como para poñernos un máis.

Abalamos?

Pois si, xa está publicada a lista na que aparecen seleccionados os centros que entran a formar parte do proxecto ABALAR. Mira por onde, viñémonos enterando pola prensa, polo facebook, polo boca-orella, pero non pola Consellería. Pero cando a nova é boa, hai que recibila ben, así que ... abalemos!

Non imos desaproveitar a ocasión de agradecer a todo o profesorado a súa colaboración no proxecto. Coa vosa enerxía e o voso traballo conseguiuse esta que esperemos sexa unha grande mellora para o cole e o noso alumnado.
Por certo, habería que ir facendo un fondo para mercar unha coiraza protectora para a titora de 5º, que será a que desenvolva o proxecto na aula... Parabéns, Isa!

Terceira avaliación e final

Achégase o fin de curso e, naturalmente, as decisións finais. Píllannos sempre "de improviso" as avaliacións, e máis se temos en conta que esta é a final. Por se tés dúbidas, consulta o calendario da vindeira semana:

Non esquezas levar contigo a documentación necesaria (seguimento do alumnado, claves para cubrir as actas). Tede en conta que os niveis que rematan ciclo deben celebrar tamén avaliación final, e valorar a promoción do alumnado. Se é preciso consignar calquera observación, podedes facelo nun folio que se anexará á acta de avaliación, recollendo as aportacións de todos os participantes na Xunta de Avaliación. Xa queda menos. 

Satisfacción

O mes de maio é o mes das flores, e tamén o das enquisas. Florecen resultados que son o espello onde mirarnos, para ter outra visión allea á nosa, "persoal e intransferible" de como é a vida no centro.

As gráficas anteriores amósannos que o alumnado de 4º e 6º está,  moi satisfeito coa escola (se exceptuamos a observación de 6º coa desaparición das actividades complementarias e extraescolares (pregunta 3). Podemos felicitarnos dos resultados coa pregunta 2 (o labor do teu titor) e 4 (a relación cos teus compañeiros). Tamén son moi valorados o servizo de transporte e o de biblioteca.

Se observamos as respostas das familias (fíxose un "muestreo" entre as que rematan ciclo), vemos que todas as familias, de poder escoller, volverían matricular os seus fillos e fillas no C.E.I.P. "Os Muíños" (pregunta 1). Superan o 80% de satisfacción a "formación" que se recibe (pregunta 2) a relación co titor ou titora (pregunta 5) e o servizo de biblioteca (pregunta 13). Os niveis mais baixos de aceptación corresponden ás instalacións do centro (pregunta 7), resultado plenamente xustificado polos sucesivos retrasos no remate das obras.

Observando as gráficas que se corresponden co persoal (docente e non docente), repítese a baixa cualificación de equipamento e recursos (entre o persoal docente). Superan o 80% de satisfacción o labor do equipo directivo (pregunta 3) e a relación co alumnado (pregunta 7). Entre o profesorado, o sistema de mellora que desenvolve o centro cumpre co criterio de calidade, pero na súa cota máis baixa, o que obrigará á esta "responsable" a poñer en evidencia as vantaxes que para o noso traballo supón este labor "extra" que desenvolve o profesorado. Con todo, máis do 80% do persoal repetiría gustoso no centro. Máis satisfeito aínda está o persoal non docente, que supera en case todos os casos o 80%. Só a insatisfacción con respecto ao resultado do seu traballo obtén unha cualificación non satisfactoria. Haberá que investigar, xa que o grao de felicidade no lugar no que pasamos a maior parte do tempo é decisivo na nosa saúde. Debemos buscar a satisfacción maior na nosa vida e, polo tanto, no noso traballo. Veremos que pasa o curso que ven.

NOTA: Se queres ver a gráfica completa, preme sobre cada unha delas.

Top 10 das ferramentas TIC-TAC

O termo "TIC-TAC" ven relacionar as "tecnoloxías da información e a comunicación" co noso labor, como "tecnoloxías da aprendizaxe e a comunicación". Moitas veces "bloqueámonos" coa cantidade de aplicacións que hai ao noso alcance para manexar na clase, desbordándonos de información. Da mesma forma que non seremos nunca capaces de ler todos os libros que nos apetecen, tampouco poderemos utilizar todas as tecnoloxías que consideramos aproveitables. A modo de pequena guía, aportamos este video que resume algunhas moi útiles para o noso traballo:

Para que non teñas que revisar todo o video, clica na lista e accede a un titorial sinxelo:

10. Wikispaces 

9. Slideshare

8. Glogster

7. Prezi

6. Google

5. Blip.tv

4. Jamendo

3. Scribd

2. Dropbox

1. Twitter

 

Cuestionarios on-line

Xa temos probado noutras ocasións os cuestionarios on-line. A ferramenta googledocs ofrece a posibilidade de crear un "formulario" con distintas opcións (podes escoller "si/non", anotar valoración nunha escala, unha resposta libre,...). Existe outra posibilidade, se queremos facer unha soa pregunta na nosa enquisa: kwiqpoll.com. Non é preciso rexistrarse e faise en dous "click". Ten un tempo límite de resposta (7 días), pero é supersencilla. Se queres saber máis, tés información na páxina de educacontic.com.

Acta de avaliación

Desde esta semana e ata finais de marzo estamos a desenvolver as sesións de avaliación. Como transcurren tres meses entre unha e outra esquecemos as "rutinas" desta actividade, e aproveitamos esta entrada para "refrescar" a memoria.
Dispoñemos de varios documentos que son necesarios para a Xunta de avaliación. En primeiro lugar, as anotacións rexistradas no "caderno do profesor" sexa cal sexa ou seu formato. Con estes tdatos teremos xa "subidas" a XADE as cualificacións do grupo avaliado. Todos os mestres participantes na sesión dispoñerán do listado de "cualificacións", para contrastar impresións con elas. Podemos modificar as cualificacións despois da sesión se o acordamos así.

O titor ou titora dispoñerá dun rexistro das faltas, para comprobar que ningún dos seus alumnos supera o límite permitido para ter dereito á avaliación continua.
Cos datos das faltas cubriremos a columna da esquerda, e en caso necesario, reflectiremos as medidas adoptar. Cos datos das cualificacións cubriremos a columna da dereita, tendo en conta que se algún alumno supera dúas áreas suspensas, considerámolo "alumno non conforme". Neste caso, acordaremos medidas a tomar, que quedarán tamén rexistradas nos cadernos do profesorado participante. Deste modo, garantimos a coordinación necesaria na sesión de avaliación.
O resumo de alumnado non conforme recóllese na portada da acta (en cifras absolutas e porcentaxe), para facilitar o balance académico que redacta a Xefa de Estudos.
Para rematar de cubrir correctamente a acta, os titores e titoras reflectirán o número de áreas non conformes según a programación impartida (na primeira páxina da acta). Aquí debe asinar tamén o profesorado participante na sesión.

Lembrade que o modelo de acta e o rexistro de faltas están recollidos nas carpetas colgantes de cada titoría. Os rexistros de cualificacións repartiranse nos casilleiros antes da sesión de avaliación.

Unha vez rematada a sesión e coas cualificacións definitivas cumprimentadas, xa podemos imprimir os boletíns. Tedes as portadas na carpeta colgante do voso grupo.

Boa xornada.

Auditoría Externa

Durante o día de hoxe desenvolvemos a xornada de Auditoría Externa. Puntualmente, coma sempre, presentouse no centro a nosa auditora, Noelia Cea Guitián, e pouco despois o inspector, Félix Perujo de Llano. Durante a mañán auditáronse as actividades de aula, as funcións de secretaría (compras, infraestruturas,...) e o sistema de mellora (obxectivos da dirección, revisión do sistema, ...). Fixemos unha breve pausa no momento do recreo para compartir impresións e café, e reanudamos o traballo ata ás dúas e media. Xa sen a presenza do inspector e logo do xantar, e despois de esbozado o informe final, revisamos as obras acompañados do responsable da empresa AEDES e do responsable da Unidade Técnica. Isto permitiunos revisar cuestións que quedaban pendentes da auditoría anterior (instalación de portas antipánico, luces de emerxencia, situación da cociña, ...).

Completado o informe, Noelia deunos a coñecer o seu resultado, que presenta dúas non conformidades asociadas á planificación (debemos facer un rexistro máis exhaustivo no seguimento de algúns obxectivos), e ás accións correctivas. Dado que son calificadas como "menores" e non teñen trascendencia, non será preciso enviar -como si se fixo en cursos anteriores- un Plan de Accións Correctivas.

Naturalmente, todo isto non sería posible se non fose polo traballo en grupo. Sen o voso esforzo, os resultados non serían os mesmos. A auditora sinalou como puntos fortes do noso centro:

- o proxecto de "Normalización Lingüística",

- as melloras realizadas na biblioteca,

- os cuestionarios enviados utilizando google docs,

- as guías para o profesorado e para as familias.

Todos estes logros son melloras conseguidas entre todos, e por iso, unha vez máis, queremos agradecer a cantidade e calidade do voso traballo, a vosa boa disposición e os sacrificios que, nunhas circunstancias como as actuais, estades facendo.

Pero, sen dúbida, o que nos fai sentir máis satisfeitos é a implicación que se reflicte no informe por parte de todo o cadro de persoal, que, tal e como se destaca na relación de "puntos fortes" que se manteñen, emprega horas libres para apoios, usa TIC´s na aula (a pesares das dificultades), usa a axenda do alumnado, rexistra as súas observacións nos cadernos, as chamadas ás familias, mantén as "mochilas viaxeiras", facendo do noso un centro que busca a mellora continua na súa tarefa diaria. Pode pedirse máis?

Aprendemos a xestionar a conta de google

Estamos avanzando no Plan de Formación! Tiñamos pensado aprender a traballar con googledocs, pero o tema estase mellorando. Agora sabemos xestionar a nosa conta de google e atopar moitas máis aplicacións que poden sernos moi útiles na clase.
Hai que dicir tamén que isto vai porque temos un bo profe, aínda que todas somos alumnas aplicadas.

Plan Anual

Aínda que imos con retraso, o prometido é débeda.
Despois de expoñer o Plan Estratéxico, tedes aquí o Plan Anual. Son seis obxectivos claros,concretos e medibles. Moitos entran na competencia case exclusiva do equipo directivo, pero outros implican a participación de grupos de mestres. Por exemplo, para conseguir o obxectivo 1 precisamos o apoio do equipo e do seminario de biblioteca, e para conseguir o obxectivo 3, o persoal integrado no Departamento de Orientación.
Faremos un seguimento de cada obxectivo, para poder verificar a súa consecución a finais deste curso. O traballo de todos nós quedará reflectido nestes documentos. Podedes ver aquí o plan para seguir o obxectivo 1.

Hai que mirar pola saúde

No número de xaneiro da revista Aula (Editorial Graó), publícase este interesante artigo que todos podemos aplicar na nosa vida diaria. A estas alturas do curso, bó será mirar por nós...

Propóñense sinxelos exercicios para mellorar a relaxación e previr lesións provocadas polo estrés. Se queres máis información, consulta o artigo aquí. Lembra non tensar o pescozo mentres lés!

Auditoría Interna

Non precisamos dicir que o pasado martes, 31 de xaneiro celebramos a Auditoría interna correspondente a este curso. Grazas á colaboración de todos e todas vós puidemos desenvolver esa xornada sen problemas. Para que vos fagades unha idea do sucedido nesas horas, aquí vai un resumo en imaxes.

Dos datos recollidos durante o día, e das conclusións ás que chegamos, tedes constancia no seguinte gráfico.

Se queredes máis información, podedes ver o informe, ou o resumo das non conformidades.

En días como hoxe

En días como hoxe todos nos achegamos ao taboleiro para ver onde temos que ir substituir. En días como hoxe non chega o tempo para nada. En días como hoxe, calquera cambio sobre o horario previsto é cousa esperada. En días como hoxe podemos aproveitar para ver á dire polo chan facendo de técnico da UAC.

En días como hoxe, en fin, agradécese volver a casa e pensar que todos nos tomamos os imprevistos cun sorriso e boa vontade, ata máis alá das cinco e media. Grazas pola "pasensia" e boa vontade de todos.

Plan estratéxico

Defintivamente, o da imaxe sería o mellor momento para difundir o Plan Estratéxico, pero este curso houbo outras prioridades, e o tempo é o que hai; de modo que, aínda que se está aplicando, non puidemos difundir de forma axeitada ata este momento, e aqui o tedes. Este é o Plan comezado no 2008 que se prolonga durante todo o mandato do Equipo Directivo. Como vedes, fóronse cumprindo obxectivos (os que están en azul) e outros foron engadidos (os que están en vermello) nos sucesivos cursos. Este Plan Estratéxico aparece recollido curso a curso no Plan Anual, que publicaremos nos vindeiros días.

Plan de Formación

Aínda que xa inciamos a súa aplicación, co comezo do curso, o Plan de Formación correspondente a 2011-2012 desenvolverase principalmente neste segundo trimestre. Para que poidades facer as vosas previsións, tédelo aquí á vosa disposición.

Lembra que, para elaborar este plan tivéronse en conta as necesidades previstas polo calendario escolar, e as recollidas na enquisa de formación na que colaborastes.