Simulacro de evacuación

O pasado día 29 de outubro fixemos o primeiro simulacro de evacuación. Como todos estabamos tan ocupados en que saise ben, ninguén se lembrou de tirar algunha foto, polo que deixamos este debuxo. Se fas clic sobre el, podes ver o informe do simulacro. Tamén podes consultalo no site da calidade (clic aquí)

Documentos organizativos do centro

Xa están accesibles os Documentos organizativos do centro: os obxectivos do Plan Anual 13-14, a Programación Xeral Anual (PXA) e o Plan Estratéxico 2012-2016.
Para consultalos ou imprimilos, non hai máis que facer clic na na imaxe.

Xornada de xadrez nos Muíños.

Dúas das primeiras figuras do Torneo Internacional de Xadrez entre Faros que está a ter lugar na nosa bisbarra,tiveron a xentileza de pasar unha mañá connosco para que os cativos tivesen ocasión de coñecelos e coñecer o seu deporte.

Fixéronlles unha chea de preguntas e mesmo xogaron unha partida a cegas cun deles, o xove campión Iván Cheparinov, que non tivo fácil a victoria.

Ao final, fixéronnos entrega dun libro e un taboleiro asinado polos campións.

Xa estamos en plena faena

Comezamos! Xa parece que o verán foi hai unha chea de tempo e aí estamos, organizando horarios, equipos, ciclos...

Por fin, quedaron configurados eses horarios que nos han acompañar o resto do curso. Se non escolleches ben, agora xa non ten remedio...

Un grupo de intrépidos romeiros e romeiras achegouse ao santuario da Barca (non pasaron do Coral) a perdirlle á Patroa que lle confira sentidiño á Patronal (LOMCE).

Hai máis xente que a Patronal precisada de sentidiño, pero iso xa é outra historia...

Pódese aprezar o comodísimo "modelito" de romeira escollido por algunha das participantes na andaina.

A mala noticia foi que o Olimpo Celta comezaba a arder... e xa sabemos como rematou a historia. A ver se desta nos decidimos a convertelo en parque natural para protexelo como precisa.

Benvida

A nosa benvida consiste en facer que todos nos sintamos agusto. Nesta foto aínda non estamos todos os que somos. Agardamos que o profesorado que se acaba de incorporar ao centro se atopase ben acollido e cómodo. Son moitas as novidades que hai que asimilar en poucos dias, pero o mes de setembro da para moito. 
Hoxe estivemos coñecendo o centro e intentado recoller toda a información posible sobre como organizarnos durante a semana.  Para que lembres o que xa levamos feito, aquí tés unha mostra:

Estatísticas sobre grao de satisfacción.

No último trimestre do curso recollemos a opinión da comunidade educativa pasando unhas enquisas ás familias dos alumnos que rematan etapa educativa (6º de infantil e 6º de primaria) e ciclo (2º e 4º de primaria), así como dos propios alumnos que rematan 2º e 3º ciclo. Tamén recabamos a opinión do persoal docente e non docente do Cole, para coñecer o seu grao de satisfacción con diferentes cuestións relacionadas co seu traballo. Nas enquisas que se pasan pregúntase por cuestións que teñen que ver coa relación entre os membros da comunidade educativa, co modelo educativo do centro, cos seus recursos, coas demandas de mellora...

Para nós é moi importante a colaboración de toda a comunidade educativa nestas enquisas (anónimas en todos os casos), xa que non hai posibilidade de mellora se non se coñecen os aspectos que hai que mellorar.

Pódense consultar estes datos estatísticos  nos enlaces que se engaden ao final, así como no taboleiro de Calidade que hai no recibidor do Cole.

Engadimos unha característica de calidade (superar o 60% de grao de satisfacción) que se ve cumprido en cáseque todos os casos.

Enquisas sobre grao de satisfacción alumnado e familias (pdf)

Enquisas sobre grao de satisfacción persoal docente e non docente (pdf)

Misión, visión e valores 2013-2017 (2ª fase)

Logo do rebumbio de ideas que fixeramos alá por febreiro no que participamos todas e todos, e no que tamén había representación das familias, levamos a cabo (o responsable de calidade e máis a directora) unha clasificación coas aportacións de todos no que se dá en chamar ideas-forza.

A semana pasada, ese grupiño de voluntarias das fotos sacamos adiante o que nos parecía "misión imposible".

Logo de grandes discusións e esforzo parimos un borrador que presentaremos en breve ao resto da comunidade  educativa.

  É certo que os pinchos d'O Pinar axudaron.

Admisión de alumnado para o curso 2013-2014

Pois si: xa estamos preparando o curso que ven. Feitas as reservas de praza, no C.E.I.P. "Os Muíños" temos estas vacantes para o 2013-2014:

CURSO	RESERVAS	VACANTES
4º INF.		20
5º INF.	10	10
6º INF.	8	12
1º PRI.	6	19
2º PRI.	7	18
3º PRI. A e B	14+15=29	21
4º PRI. A e B	31	19
5º PRI.	24	1
6º PRI.	20	5

Mañán, día 5 de abril comeza o proceso de admisión. Isto quere dicir que todo o alumnado que queira comezar a estudar no C.E.I.P. "Os Muíños" debe solicitar praza no noso centro. Dispón ata o 17 de abril para presentar esta solicitude. 

Este ano, as condicións da admisión vironse modificadas, e foron engadidas novas cláusulas que deberán ser consultadas polas familias, referidas á baremación e documentación a presentar. 

Tamén hai modificacións no calendario: neste curso, o prazo de admisión vai do día 5 ao 17 de abril.

Despois de rematado o proceso de admisión, informaremos ás familias de nova incorporación da documentación necesaria para matricular ao novo alumnado. Agardaremos a que chegue o mes de xuño. 

Para consultar obter información completa sobre o proceso, premer aquí.

2ª avaliación en marcha

Entre os días 11 e 19 de marzo serán as xuntanzas da 2ª avaliación. Non hai que esquecer preparar as sesións engadindo os datos 48 horas antes das mesmas no XADE. Pódese consultar o calendario facendo clic  aquí
Outra documentación precisa:

• Procedemento
• Instruccións para preencher as cualificacións de cada titoría
• Modelo Xade Acta da avaliación 
• Claves de apoio para cumplimentar as actas da xunta de avaliación

Auditoría externa 2013.

Xa estivo por aquí Noelia, a auditora de AENOR. Agás un par de cousiñas que hai que retocar na organización da documentación (todas culpa do novo irresponsable de calidade) non atopou deficiencias no noso sistema que cualificou de apto e que evoluciona ben. Aí quedan as fotos da xornada.

Auditoría externa de seguimento.

Mañá martes, recibiremos á auditora de AENOR que levará a cabo a auditoría de seguimento para manter a nosa certificación. É un bo momento para consultar dúbidas e lembrar que a palabra auditoría está cargada dun matiz pouco atractivo innecesario, xa que o peor que pode pasar é que atopemos erros. Todos sabemos que os erros serven para mellorar e o problema non é atopalos, senón ignoralos ou agochalos debaixo da alfombra. Lembrade a rima: auditoría - alegría... Sorte e ante todo... moita calma. Seguiremos informando.

Misión, Visión e Valores do Centro.

O Documento MC Anexo F do Manual de Procedementos do Sistema de Mellora do noso centro é o que recolle a Misión (razón de ser do Centro) a Visión (como nos vemos ou como nos queremos ver) e os Valores que pretendemos practicar e nos que queremos educar aos nosos alumnos.  O documento (con máis nome de meteorito ca outra cousa) ten un gran valor xa que  marca a finalidade última á que aspiramos como educadores (mestres, familias, persoal laboral do centro...). Por iso é importante que na súa elaboración haxa unha representación o máis ampla posible da comunidade educativa.

O primeiro paso para renovar a Misión, Visión e Valores do centro está dada coa posta en marcha dun remuíño (mellor que chuvia, que xa tivemos abonda) de ideas. Aí estamos profes, nais e persoal laboral aportando as nosas ideas para a esa renovación e posta ao día que facemos cada catro anos.

Seguiremos informando das sucesivas fases.

Cuestión de educación

Este foi o título da reportaxe que hai unha semana emitiu "La Sexta" dentro do seu programa "Salvados". Jordi Évole, o seu presentador, é o que fai as preguntas pertinentes ou impertinentes, esas que todos quixéramos facer e que ás veces non nos atrevemos, ben porque pensamos que non son convenientes, ou porque cremos que nos tomarán por tontos se as formulamos. Creo que case todos os docentes estivemos diante da pantalla aquela noite. Por se acaso eres un dos que non estiveron, non tés máis que premer aquí e podes adicar uns minutos (ben investidos) a ver e escoitar.

Máis de 4 millóns de espectadores seguiron o programa (no momento estelar, 5.307.000, un 23.6% de share). Podemos pensar que moitos fans da Esteban tamén estaban vendo "Salvados", e iso é unha excelente noticia.
Coma sempre, despois do acontecemento, desátase unha chuvia de opinións, ás veces tormenta, da que podemos tirar moitas conclusións tomando un café na sala de mestres, ou de charla nun bar. 

A parte negativa sucede cando algúns opinadores de profesión, sen preguntar, opinan cousas "chuscas" coma esta, co perigo de que o fan non so desde o twitter, senón desde a tele, unha plataforma desde a que o chío se transforma en estrondo estarrecedor. 
Afortunadamente, tamén contamos con profesionais que aportan o seu gran de area, e xa coñecemos todos aquilo de "tacita a tacita...". A miña intención é aportar tres groliños máis, dos que teño visto esta semana, para pararse a pensar. 

Esta viñeta explica moi ben por que son máis de 2.500 km. os que nos separan de Finlandia. Comecemos por saber que todo o que atinxe a educación en Finlandia está en mans dos Concellos -non só o mantemento das instalacións-, e iso aquí sería factible? Se queres máis información sobre o sistema, podes premer aquí para ver un resumo en 5 claves do seu éxito.

Sistema educativo español.

Sen embargo, non todo é música celestial. Como di Ana Rosa, todos coñecemos o elevado índice de suicidios entre os adolescentes finlandeses. Podes ler aquí un interesante artigo no que se analiza a importancia da responsabilidade que se inculca nas súas escolas, fronte á felicidade que todos buscamos para os nosos pequenos. É ben difícil escoller. Pero ... quen dixo que era necesario elixir? 

Sistema educativo finlandés

O informe PISA non inclúe ningún parámetro no que se reflicta o nivel de felicidade do alumnado, nen aquí nen en Finlandia. E tampouco -todo hai que dicilo- o do profesorado.
Todos os que estamos "a pé de obra" sabemos do esforzo e da ilusión que investimos no noso traballo. Sabemos das horas extra que adicamos a pensar e repensar o que facemos día a día. Non perdamos a confianza en nós mesmos porque estamos a anos-luz de Finlandia. Se cadra, un destes "buracos negros" nos que nos metemos acabará levándonos moi perto deles. Ou é que xa estamos máis perto do que parece?
Para rematar a reflexión déixovos a opinión de Fernando Trujillo, profesor da Universidade de Granada, cun suxestivo consello: "Jordi, no vayas a Finlandia".

Auditoría interna en marcha.

Botan fume os papeis. A actividade era frenética na mañá do martes, 29, neste caso, na secretaría. Na transcrición do son escoitarianse palabros coma non conformidades, procedementos, seguimentos de control, verificacións, homoxeneizacións, plans, estratexias... Continuaremos informando.