AUDITORÍA INTERNA

 Desde o mes de xaneiro e durante todo febreiro estamos realizando a auditoría interna correspondente a este curso 24/25. Aínda que con certas dificultades para encaixar no horario, a auditoría estase a desenvolver con normalidade e bo humor. Agardamos que, como en cursos anteriores, sirva para mellorar o noso traballo diario e o resultado do noso esforzo. 

Auditoría externa 2014

Os días 10 e 11 deste mes tivemos a auditoría externa anual que este ano foi de renovación. Parece que todo foi bastante ben: algunhas observacións que nos fai a auditora teñen que ver coa xestión da documentación, coas compras, con algún pequeno esquecemento... nada grave, en calquera caso. Só se rexistrou unha non coformidade e esta foi allea ás nosas competencias, porque ten que ver co mantemento e nós pouco máis podemos facer que demandar que nolo fagan periodicamente e insistir se non nolo fan.

Grazas a todas e a todos vós pola vosa colaboración e polo bos resultados acadados que nos permiten renovar e manter a certificación de AENOR nos termos que se indican no informe da auditora: "o sistema de xestión de calidade  percíbese como un sistema apto e que evoluciona de forma axeitada, existindo unha sistemática solidamente implantada e asumida polo persoal do centro".

Auditoría externa 2013.

Xa estivo por aquí Noelia, a auditora de AENOR. Agás un par de cousiñas que hai que retocar na organización da documentación (todas culpa do novo irresponsable de calidade) non atopou deficiencias no noso sistema que cualificou de apto e que evoluciona ben. Aí quedan as fotos da xornada.

Auditoría externa de seguimento.

Mañá martes, recibiremos á auditora de AENOR que levará a cabo a auditoría de seguimento para manter a nosa certificación. É un bo momento para consultar dúbidas e lembrar que a palabra auditoría está cargada dun matiz pouco atractivo innecesario, xa que o peor que pode pasar é que atopemos erros. Todos sabemos que os erros serven para mellorar e o problema non é atopalos, senón ignoralos ou agochalos debaixo da alfombra. Lembrade a rima: auditoría - alegría... Sorte e ante todo... moita calma. Seguiremos informando.

Auditoría interna en marcha.

Botan fume os papeis. A actividade era frenética na mañá do martes, 29, neste caso, na secretaría. Na transcrición do son escoitarianse palabros coma non conformidades, procedementos, seguimentos de control, verificacións, homoxeneizacións, plans, estratexias... Continuaremos informando.

Auditorías

Xa temos calendario para as auditorías anuais. Lembrade que auditoría rima con alegría ou lotería e ten que ser unha palabra que nos transmita outras sensacións distintas ás que lle atribuímos habitualmente.

Auditoría Externa

Durante o día de hoxe desenvolvemos a xornada de Auditoría Externa. Puntualmente, coma sempre, presentouse no centro a nosa auditora, Noelia Cea Guitián, e pouco despois o inspector, Félix Perujo de Llano. Durante a mañán auditáronse as actividades de aula, as funcións de secretaría (compras, infraestruturas,...) e o sistema de mellora (obxectivos da dirección, revisión do sistema, ...). Fixemos unha breve pausa no momento do recreo para compartir impresións e café, e reanudamos o traballo ata ás dúas e media. Xa sen a presenza do inspector e logo do xantar, e despois de esbozado o informe final, revisamos as obras acompañados do responsable da empresa AEDES e do responsable da Unidade Técnica. Isto permitiunos revisar cuestións que quedaban pendentes da auditoría anterior (instalación de portas antipánico, luces de emerxencia, situación da cociña, ...).

Completado o informe, Noelia deunos a coñecer o seu resultado, que presenta dúas non conformidades asociadas á planificación (debemos facer un rexistro máis exhaustivo no seguimento de algúns obxectivos), e ás accións correctivas. Dado que son calificadas como "menores" e non teñen trascendencia, non será preciso enviar -como si se fixo en cursos anteriores- un Plan de Accións Correctivas.

Naturalmente, todo isto non sería posible se non fose polo traballo en grupo. Sen o voso esforzo, os resultados non serían os mesmos. A auditora sinalou como puntos fortes do noso centro:

- o proxecto de "Normalización Lingüística",

- as melloras realizadas na biblioteca,

- os cuestionarios enviados utilizando google docs,

- as guías para o profesorado e para as familias.

Todos estes logros son melloras conseguidas entre todos, e por iso, unha vez máis, queremos agradecer a cantidade e calidade do voso traballo, a vosa boa disposición e os sacrificios que, nunhas circunstancias como as actuais, estades facendo.

Pero, sen dúbida, o que nos fai sentir máis satisfeitos é a implicación que se reflicte no informe por parte de todo o cadro de persoal, que, tal e como se destaca na relación de "puntos fortes" que se manteñen, emprega horas libres para apoios, usa TIC´s na aula (a pesares das dificultades), usa a axenda do alumnado, rexistra as súas observacións nos cadernos, as chamadas ás familias, mantén as "mochilas viaxeiras", facendo do noso un centro que busca a mellora continua na súa tarefa diaria. Pode pedirse máis?

Auditoría Interna

Non precisamos dicir que o pasado martes, 31 de xaneiro celebramos a Auditoría interna correspondente a este curso. Grazas á colaboración de todos e todas vós puidemos desenvolver esa xornada sen problemas. Para que vos fagades unha idea do sucedido nesas horas, aquí vai un resumo en imaxes.

Dos datos recollidos durante o día, e das conclusións ás que chegamos, tedes constancia no seguinte gráfico.

Se queredes máis información, podedes ver o informe, ou o resumo das non conformidades.

Auditoría Externa

Como todos sabedes, a Auditoría Externa desenvolveuse durante dous días, o 28 de febreiro e o 1 de marzo. Tratábase dunha ocasión especial, xa que esta era unha auditoría "de renovación": hai que facela cada tres anos, para asegurar que o Sistema que temos deseñado goce de boa saúde, amosando que todos os rexistros se manteñen ao día, e que o traballo se actualiza e renova.
Durante a primeira xornada auditáronse as actividades de aula, e colaboraron no traballo as profesoras de Educación Física, e as titoras de 5º de primaria e de 6º de infantil . Queremos agradecer especialmente a súa dispoñibilidade. Tamén foi revisado todo o apartado de Orientación, no que participaron a orientadora e os mestres de PT. Sen o seu bo facer sería moi difícil poñer ao día este procedemento, un dos máis importantes para o noso labor, porque nel conflúe unha boa parte das nosas tarefas. Auditouse no propio luns a Xefatura de Estudos, e iso supón un enorme esforzo para Begoña, que acaba de estrearse no cargo neste curso.

No segundo día foron auditadas as responsabilidades da dirección e a xestión do sistema. Tivemos a sorte de contar coa presenza do Inspector Xefe e da Inspectora de Zona, que fixeron interesantes aportacións durante a auditoría. Con eles realizamos a visita ao centro, para revisar as infraestructuras, un dos nosos puntos febles.

Unha vez revisados todos os rexistros e o propio centro, a auditora, Patricia, encerrouse no despacho para redactar o Informe de Auditoría. Cando rematou, recibimos a boa noticia de que so resultaran dúas non conformidades:
- Infraestructuras: detállanse as carencias que presenta o centro, e que xa foron detectadas noutraas ocasións (simulacros de autoprotección, inspeccións de sanidade,...). Por outra parte, temos constancia delas polas constantes anotacións no caderno de mantemento, e os resultados das enquisas de grao de satisfacción que realizamos en abril.
- Servizos: Faltan algúns rexistros da nosa actividade docente. Trátase dunha proba máis da situación na que comezamos este curso. Lembrade que, ao inicio das clases faltaban 5 mestres por nomear, algúns deles titores; non tivemos unha segunda especialista de inglés ata finais de outubro, e a responsable de Orientación adscribiuse a este centro neste curso. Con todo, o balance é máis que satisfactorio, se temos en conta o número de baixas e conseguintes substitucións producidas.



Xa temos redactados os informes que enviaremos á empresa AENOR. Neles detallamos o que imos facer para dar solución ás non conformidades detectadas:
- Manteremos o contacto coa Consellería, para facer un seguimento das obras que se van executar, con especial atención nos puntos febles sinalados no informe de Patricia.
- No comezo do vindeiro curso procuraremos poñer a disposición do profesorado (especialmente do de nova incorporación) a documentación necesaria para o seu labor. Veremos se é posible iniciar o curso con normalidade, con tempo suficiente para formarnos e adaptarnos.
Para rematar, pensamos que é preciso destacar os puntos fortes detectados pola auditora, e que son produto do esforzo diario dos profesionais que traballan no centro. Por todo isto, felicitámonos e agradecemos aos mestres, ás mestras e ao pesoal non docente a súa ilusión e o seu esforzo.

Resultados da Auditoría Interna

Agora, rematando o día 2 de febreiro, é o momento de lembrar, recompoñer e reflexionar. A Auditoría Interna caracterizouse polo clima de traballo aberto, relaxado, e de colaboración, tanto dentro do grupo auditor, como fóra. Somos conscientes do enorme esforzo que supón para todos o día da auditoría, e por iso debemos felicitarnos polo seu resultado.
Con todos os datos recollidoselaborouse unha lista na que se resumen as áreas auditadas e as non conformidades detectadas. A modo de resumo de todo o proceso, elaborouse un informe, que será presentado cando se celebre a Auditoría Externa.
Podes ver o resultado resumido nesta gráfica:

Isto quere dicir que temos abertas catro non conformidades; para cada unha delas buscaremos unha solución, e redactaremos un pequeno informe do que pensamos facer. Así de simple. Son moi sinxelas:
- Debemos expoñer o "Plan Estratéxico" no taboleiro de anuncios da calidade. Coas présas, a principios de curso, esquecéusenos, e só colgamos o "Plan Anual".
- Aínda que o botiquín (caixa de emerxencias) foi renovado en setembro, esquecéusenos actualizar a folla de mantemento, e figura a de decembro do 2009. Substituirémola.
- Será preciso divulgar o Plan de Acción Titorial, que xa está elaborado, para poder aplicalo realmente. Sabemos todos que o de Orientación é un traballo especialmente complexo e que no noso centro presenta unhas dificultades agravadas polo alto número de casos que atender e a sobreocupación que ten a responsable. Convén que apareza esta non conformidade porque é un fiel reflexo das áreas nas que o noso centro merece especial atención.
Aquí tedes en imaxes un resumo da xornada:

O Día da Auditoría

Así, con maiúsculas, porque todos pensamos que o Día da Auditoría debería ser festivo, non? Non é festivo, pero podemos tomalo con alegría, por que non? Xa sabemos que estaremos algo liados, e que a algúns nos tocará madrugar máis ou marchar máis tarde; unha vez asumido, tomémolo con filosofía. A auditoría interna servirá para que melloremos o noso traballo, para que cada día esteamos máis seguros dos que imos facendo, e que isto sexa recoñecido como un valor de auténtica calidade. A estas alturas xa estamos seguros de que "isto da calidade" non supón mellores instalacións ou máis cartos no centro, pero si maior coordinación e mellor comunicación.

O día 1 de febreiro Ana Montáns e Rosa Barreiro virán desde Ponteceso para axudarnos e compartir con nós a súa longa experiencia. A súa colaboración sempre proporciona simplicidade ao noso sistema, e son unhas excelentes aliadas para mellorar o noso labor. Tamén nos acompañarán José Manuel Carbia Pichel e Juan José Cano Fernández, que traballan como asesores na Consellería pero que tamén son mestres, con moita experiencia neste tipo de traballo. Colaboramos con eles no Grupo de Traballo do que formamos parte en Santiago.

Que pasa o día 1?

O primeiro que faremos será reunir a todo o grupo auditor para unha primeira toma de contacto. Despois, repartirémonos en grupos, para revisar toda a documentación e rexistros que levamos acumulado desde marzo do ano pasado (data da última auditoría). Un dos grupos estará adicado a revisar a documentación correspondente a dirección, outro grupo revisará a de secretaría, outro a de xefatura de estudos, e outro máis a de actividades de aula. Aquí é onde pedimos a v

osa colaboración. Se resultas seleccionada (escóllese ao chou), non tés máis que aportar o teu caderno do profesor, ou o teu diario de clase, ou onde sexa que recollas o que fas diariamente, e onde reflictes o seguimento do alumnado.

Que pasa se non dispoñemos do que nos pide?

Nada en absoluto. Moitos de vós estaredes preocupados por se vos falta este ou aquel papeliño, ou se non tedes todo ben apuntado, ou calquera outra cousa. Se algo falta, ou non aparece no momento da auditoría simplemente se anotará : "Non hai evidencia de que exista o rexistro....." sen nomes, sen cursos e sen referencia persoal algunha. Nunha auditoría non se buscan NUNCA culpables ou responsables, senón simplemente a causa de que algo non estea como estaba previsto.

O Equipo Auditor se reunirá co profesorado na hora do recreo, na que coincidiremos para tomar café (e galletas, se hai). Logo, seguiremos auditando ata as 14.30, hora na que faremos unha pausa para comer. Ás 15.30 volveremos reunirnos todos para "volcar" todos os datos recollidos nun informe final, que se publicará neste "Remuíño".

As Auditorías son unha excelente oportunidade para intercambiar información e aprender. Xa estamos habituados a colaborar, compartir e traballar en equipo. Este será un paso máis, que sabemos será unha experiencia moi positiva para todos.

Falaremos o mércores.

Feliz semana!

Resumo do informe

Despois de pechada a non conformidade resultante da auditoría de onte, resumimos as observacións feitas, que axudarán a que o noso Sistema sexa máis efectivo:
- Debemos rematar de adaptarnos á norma UNE-EN ISO 9001:2008, xa que están pendentes os procedementos dos puntos 7 e 8.
- Faranse correccións sinxelas, debidas a erros de interpretación ou a simples despistes, mellorando a efectividade dalgúns controladores (como no caso do control das accións correctivas).
- Procurarase manter un rexistro das reunións do departamento de Orientación no centro.

A Auditora detectou as seguintes oportunidades de mellora:
- Optimización dos cadernos do profesor, e desenvolvemento do caderno electrónico.
- Reducir a burocracia do sistema, así como optimizar a documentación.
Estes aspectos deberán ser tratado desde o Equipo de Dinamización da Calidade, constituído en Grupo de Mellora.

A Auditora Xefe sinalou como puntos fortes da nosa organización os seguintes:
- Colaboración do persoal auditado.
- Implicación do Equipo Directivo no sistema de xestión do centro.
- O blog "O Remuíño".
Sentímonos moi orgullosos destes comentarios, especialmente do primeiro punto, polo que supón de implicación do profesorado no desenvolvemento do traballo. Agradecemos tamén a Noelia, o seu bo carácter e a súa actitude de colaboración e comprensión, que sen dúbida foron de gran axuda para todos.

Non conformidades

A falta de analizar polo miúdo o informe feito pola Auditora Xefa, a auditoría de onte ofrece un resultado magnífico: tan só unha non conformidade, que afecta á xestión, e que se solucionará hoxe mesmo. Polo tanto, non será preciso realizar un Plan de Accións Correctivas. Diante disto, so nos queda felicitar a todo o persoal, tanto o que participiou directamente, como o que tivo que substituir, o que tivo destino neste centro en cursos anteriores, e todos aqueles que pasaron os seus inevitables nervos ao enfrentarse a esta nova experiencia. Sen todos vós este resultado sería imposible. Por iso, a todos, PARABÉNS E MOITAS GRAZAS.

Auditoría Externa

Moitos vos preguntaredes para que hai que pasar unha segunda auditoría (con persoal externo), se xa pasamos unha auditoría interna. Tentaremos explicalo de forma sinxela.
O obxectivo da auditoría interna foi revisar toda a documentación para ver o que se podía mellorar. E a externa consiste en comprobar desde fóra, que de verdade fixemos o que tiñamos planificado. A función de Noelia (a auditora que virá) é axudarnos a comprobar que realmente está todo como ten que estar. A nosa función é colaborar.

Poñamos un exemplo: a un titor pode preguntarlle por un alumno con NEAE. Se o resultado na última avaliación foi negativo, houbo propostas de medidas a tomar. Temos rexistro do seu seguemento no noso caderno ou no da profesora de apoio?
Que pasa se non temos o que se nos pide? Nada. A auditora anota que non ten evidencia de que estes datos estean recollidos, sen explicitar o profesor ou alumno concreto (non é un dato relevante) para que busquemos logo formas de solucionalo. Por suposto, os datos concretos de alumnado, profesorado, etc., son completamente confidenciais, e non entran a formar parte da auditoría. O que interesa é se se está cumprindo o proceso que temos planificado, e cales son as evidencias de que se cumpre.
Unha vez rematada a auditoría, Noelia redactará un informe, no que se enumeran as accións que debemos levar a cabo para reparar posibles erros e daranos un prazo dun mes para facer un Plan de Accións Correctivas. Enviarémoslle este Plan, e deste xeito quedará actualizada a nosa certificación.

Resultado da auditoría

Durante a Auditoría Interna celebrada o pasado día 25, o Equipo Auditor elaborou un informe do que se deducen interesantes observacións e suxestións, e catro non conformidades. Tédelas dispoñibles no documento "Relación de non conformidades na Auditoría Interna". Comentámolas a continuación:
- A principios de curso repartimos entre os alumnos recién incorporados unhas enquisas para valorar a acollida. Non sabemos onde están, e deberemos tomar algunha medida para que isto non se volva repetir.
- O procedemento de "Orientación" está en fase de reelaboración. No que está vixente actualmente non consta ningún criterio de aceptación, que incluiremos no prazo máis breve posible.
- Non están cubertas as presentacións de todas as áreas. Xa sabiamos que isto ía pasar, dadas as circunstancias que se produciron a principios de curso. Haberá que habilitar algunha medida para que se presenten todas, mesmo fóra de prazo.
- Será preciso mellorar e facilitar o seguimento do caderno do profesorado, xa que nalgún caso non hai evidencia de que se apliquen os reforzos planificados, por exemplo. Buscaremos algún método para facilitar o seguimento do alumnado.
En resumen, das catro non conformidades, 1 se corresponde co procedemento de acollida ao alumnado, outra co procedemento de orientación, e dúas máis coas actividades de aula. O que debemos facer neste momento é deseñar algunha estratexia correctora para que as deficiencias detectadas non se volvan repetir. Manterémosvos informados.

Desenvolvemento da Auditoría Interna

Aínda que comezos con algo de retraso, a auditoría interna deste curso desenvolveuse con normalidade e sen especiais sorpresas. Notouse, por suposto, que non era un día normal: houbo que unir grupos, facer substitucións,... houbo máis patio para os nenos e para os profes. Aparte diso, non podemos obviar o magnífico ambiente de traballo no que se desenvolveu a xornada. A colaboración das nosas compañeiras do CRA de Ponteceso e dos asesores da Consellería, José Antonio e José Manuel foi valiosísima. Agradecemos especialmente a boa disposición dos observadores: Begoña, Estela, Rocío e Romu estiveron ao pé do canón, tomando notas, e ofrecendo suxestións (verdade....?). E, por último, os profes e persoal auditado, que puxeron á nosa disposición o seu traballo, valorando as aportacións que ofreceron os demais. A partir de agora poderemos mellorar a utilidade práctica dos nosos cadernos, facer máis áxiles as nosas programacións e poñer definitivamente en marcha procedementos que tiñamos collidos con fíos. Definitivamente, unha xornada moi aproveitada. Próximamente publicaremos o informe.Parabéns a todos.

Que pasa coa auditoría?

Como lembramos no último claustro, o luns, 25 celebraremos a Auditoría Interna correspondente a este curso. Moitos temos participado xa noutras auditorías, pero é natural que os que non participaron ata agora se pregunten exactamente que é e como lles vai afectar.
Realizar unha auditoría é como facer inventario. Trátase de ver o que temos, e comprobar que todo está no seu sitio, tal como prevíamos a principios de curso. Sería ideal que todo cadrase tal como planeamos en setembro, pero xa temos asumido que non vai ser así. Por iso facemos a auditoría: para averiguar que é o que non está donde debería, e pensar logo como podemos remedialo.
Por exemplo, se temos establecido que, como medida de seguridade, os botiquíns do centro se revisan unha vez ao ano, nunha auditoría se comprobará que están revisados,e a data da última revisión. Se temos establecido que o 70% das programacións deben entregarse antes do 15 de Outubro, durante a auditoría se buscará a documentación que reflicte que polo menos o 70% das programacións foron entregadas nese prazo.

En que me afecta a min a auditoría como mestre do centro?
Faremos un esforzo para que se note o menos posible, pero será inevitable que repercuta nos horarios, e nas substitucións. Pedimos a túa comprensión, e a túa colaboración, como sempre que se desenvolve unha actividade extraordinaria no centro.
Durante a auditoría, escollerase, ao chou, algún mestre do centro para pedirlle que colabore na auditoría directamente. Pedirémoslle que nos explique como completa o seu caderno como fai o seguimento da programación, a forma en que calculou a cualificación na avaliación, seguindo os criterios acordados a principios de curso, etc. Nese momento, é anconsellable comentar todas as dúbidas que se teñan, facer preguntas, observacións, e anotar canta suxestión poida ser útil para máis adiante. Non se trata dun exame, ou de buscar erros, ou de sinalar a ninguén; iso non sirve de nada. Trátase de buscar a forma de melloralo.
E que pasa se algo non está ben?
Nunha auditoría nunca está nada "ben" ou "mal". Simplemente non está conforme ao que tiñamos planeado. Se o botiquín non está actualizado, ou non se pode demostrar que se entregaron as programacións en tempo, ou non aparece o seguimento das actividades na aula, tómase nota, e búscase a causa para atopar a forma de remedialo. Pode ser que se nos esquecese apuntar a data de renovación do botiquín, que as programacións non se entregaran en tempo porque fallaron os ordenadores, ou que non se rexistraran as actividades de aula porque non sabíamos que tiñamos que facelo. Por iso procuraremos a maneira de previr que non volvan caducar os medicamentos, que todo o profesorado poida cumprir o prazo de entrega, ou que se lembren de anotar as actividades que van facendo cada día.
E por que ten que vir persoal alleo ao centro?
O noso cole non é moi grande, pero a súa xestión é complexa. Para revisar toda a documentación nun so día precisamos axuda. Outra razón é que o persoal que non pertence ao centro pode aportar suxestións a partir das súas experiencias, que nos axuden a mellorar a nosa. É unha excelente oportunidade para intercambiar información; por iso vos pedimos que abrades ben os ollos e anotedes calquera comentario que nos poida axudar. En cada grupo estará presente un compañeiro noso que axudará na tarefa.

Se queres coñecer cal é o plan que temos para ese día, con horarios e documentación a revisar, clica aquí.
Non esquezas compartir a hora do café. Verémonos ás 11.50