As gráficas do curso 21-22

 Aquí deixamos un resumo das enquisas sobre o grao de satisfacción da comunidade educativa en forma de gráficas.

Para velas todas fai clic aquí

Auditoría externa 2022

 O pasado luns, 14 de marzo, realizamos a auditoría anual de Aenor contando coa presenza de Alejandro Bouza, como Auditor Xefe e Magdalena Duarte, a nosa inspectora de Educación.

Os resultados da auditoría foron todos favorables agás os relativos a instalacións e mantemento que orixinaron unha Non Conformidade, á que deberá dar solución o Concello de Muxía.

Auditoría Interna

 Este curso a Auditoría Interna será, ao igual que no pasado ano, máis interna ca nunca, xa que non poderemos contar con persoal (docente ou técnico da Consellería) alleo ao Centro. Exercerá como Auditora a compañeira Susana Seoane (á cal lle agradecemos a súa impagable colaboración) e adaptaremos calendario e horario para que repercuta o menos posible no día a día do cole.

Comezo do curso 2021-2022

A falta da viñeta de Davila sobre o comezo de curso... esta moi boa de Xosé Tomás...

 

Comezamos o novo curso (2º curso da era Covid) sen carencias de profesorado, pero con outras dificultades que teñen que ver co mantemento e limpeza (ou coa falta dos mesmos por parte de quen corresponde) e co persoal non docente: ausencia de conserxe (un ano máis).

Seguindo os procedementos do noso Sistema de Mellora levamos a cabo a acollida do profesorado de nova incorporación.

Velaí estades...

Benvidas e benvido! E moita sorte e ánimo a todo o profesorado!

Misión, visión e valores (2021-2025)

 Nos pasados meses renovamos a Misión, Visión e Valores do centro. Tátase dun documento que ás veces pasa desapercibido pero no que expresamos o que para nós, como comunidade educativa, representa o CEIP dos Muíños. Todos os obxectivos que se propoñan van ter relación con esta Misión, polo que funciona como un punto de partida para enfocar o noso traballo e o estilo do centro.

Para elaborar este documento, normalmente constituímos un grupo de traballo reducido (5 ou 6 persoas) que a elaboran nunha xornada a partires das aportacións de ideas do Claustro e o Consello Escolar. Na presente elaboración da Misión tivemos que adaptarnos ao protocolo Covid e traballar online xa que non era aconsellable facelo de xeito presencial. Para levalo a cabo elaboramos un cuestionario de partida que nos permitiu contar coas ideas de toda a comunidade educativa.

 

Facendo clic neste enlace pódense ver os resultados finais. A nova redacción da Misión quedou así:

A finalidade do CEIP Os Muíños é fomentar a creatividade e o espíritu crítico no alumnado, para acadar o éxito escolar a través dun enfoque innovador, colaborativo, compensador de desigualdades e inclusivo, que favoreza un clima saudable e seguro e o compromiso de toda a comunidade educativa.